वंचित बहुजन आघाडीच्या तोफा उद्या नगरमध्ये धडाडणार 

नगर : आगामी निवडणुकींच्या पार्श्वभूमीवर  राज्यात गेल्या काही दिवसात राजकीय घडामोडींना वेग आला आहे. वंचित बहुजन आघाडीचे नेते  अ‍ॅड. प्रकाश आंबेडकर व ‘एमआयएम’चे नेते  असदुद्दीन ओवेसी यांच्या उपस्थितीत वंचित बहुजन आघाडीची सत्ता परिवर्तन जाहीर सभा शुक्रवारी दुपारी २ वाजता स्टेशन रोडवरील क्लेरा ब्रुस हायस्कूलच्या मैदानावर होणार आहे.

असदुद्दीन ओवेसी यांचा एमआयएम पक्ष आणि प्रकाश आंबेडकर यांचा भारिप बहुजन महासंघ एकत्र  राज्यातील निवडणूका लढण्याच्या तयारीत आहे.जागावाटप करताना सन्मानजनक वागणूक न मिळाल्याने तसेच १२ जागा सोडण्यास आघाडीने नकार दिल्याने वंचित बहुजन आघाडीने स्वबळावर निवडणुका लढविण्याचा निर्णय घेतला आहे.

दुसऱ्या बाजूला भाजपला सत्तेवरून हटविण्यासाठी  राष्ट्रवादी , काँग्रेस आणि इतर पक्ष आपापसात  भाजप विरुद्ध आघाडी करत आहेत.मात्र   वंचित बहुजन आघाडीने एका पेक्षा एक सरस उमेदवार घोषित करत यासर्व पक्षांच्या तोंडचे पाणी पळविले आहे.