‘याला बडे दिलवाला म्हणतात’, उदयनराजेंनी थोपटली महाराष्ट्र केसरीची पाठ

टीम महाराष्ट्र देशा : महाराष्ट्र राज्य कुस्तीगीर परिषद आणि अमनोरा तर्फे म्हाळूंगे-बालेवाडी येथील श्री शिवछत्रपती क्रीडा संकुल येथे आयोजित ‘६३ व्या महाराष्ट्र केसरी कुस्ती स्पर्धे’ची फायनल मोठ्या चुरशीच्या वातावरणात पार पडली. गादी व माती अशा दोन्ही विभागातून अर्जुन पुरस्कार विजेते काका पवार यांच्या तालमीतील मल्ल हर्षवर्धन सदगीर आणि शैलेश शेळके मंगळवारी महाराष्ट्र केसरी किताबच्या आखाड्यात आमनेसामने होते. या अत्यंत प्रतिष्ठेच्या हर्षवर्धन सदगीरने बाजी मारली.

३-२ अश्या फरकाने हर्षवर्धन सदगीर याने हि बाजी मारली. अत्यंत खिलाडू वृत्तीचे दर्शन या कुस्तीनंतर पाहायला मिळाले. अतिं सामन्यात पराभूत झालेल्या शैलेश शेळके याला हर्षवर्धन सदगीरने आपल्या खांद्यावर उचलून घेत अवघ्या महाराष्ट्राचे मन जिंकून घेतले.

यावर महाराष्ट्र केसरी हर्षवर्धन सदगीर याचे अभिनंदन माजी खासदार उदयनराजे भोसले यांनी खास आपल्या शैलीत केले आहे. ‘हे असं फक्त महाराष्ट्राच्या भूमीतच पाहायला मिळत…विजयी मल्ल पराभूत मल्लाला खांद्यावर घेऊन आखाड्यात मिरवतो, याच खिलाडूवृत्ती ला बडे दिलवाला म्हणतात !विजयी पैलवान महाराष्ट्र केसरी हर्षवर्धन सदगीर व उपमहाराष्ट्र केसरी पैलवान शैलेश शेळके यांचे खूप खूप अभिनंदन’. अस ट्विट उदयनराजे भोसले यांनी केले आहे.

हे असं फक्त महाराष्ट्राच्या भूमीतच पाहायला मिळत…विजयी मल्ल पराभूत मल्लाला खांद्यावर घेऊन आखाड्यात मिरवतो, याच खिलाडूवृत्ती ला बडे दिलवाला म्हणतात !
विजयी पैलवान महाराष्ट्र केसरी हर्षवर्धन सदगीर व उपमहाराष्ट्र केसरी पैलवान शैलेश शेळके यांचे खूप खूप अभिनंदन. pic.twitter.com/rgAux8KW3V

— Chhatrapati Udayanraje Bhonsle (@Chh_Udayanraje) January 7, 2020

दरम्यान, शैलेश आणि हर्षवर्धन हे एकाच तालमीत शिकत असल्यामुळे दोघांनाही एकमेकांची बलस्थानं आणि कच्चे दुवे माहिती होते. पहिल्या डावात दोघांनीही बचावात्मक खेळ केला. अति बचावात्मक कुस्ती खेळल्यामुळे पंचांनी शैलेश शेळकेला एक गुण बहाल केला.

दुसऱ्या डावातही दोन्ही मल्ल एकमेकांना वरचढ होण्याची संधी देत नव्हते. दुसरा डाव संपायला येत असताना हर्षवर्धननेही एक गुण कमावत बरोबरी साधली. मात्र शेवटच्या १-० सेकंदात हर्षवर्धनने निर्णयाक डाव टाकत महत्वाच्या दोन गुणांची कमाई करत मानाचा महाराष्ट्र केसरी किताब पटकावला.