‘मनसे म्हणजे गळकं घर’

🕒 1 min read

औरंगाबाद: आगामी निवडणुकांच्या पार्श्वभूमीवर सर्वच पक्षांची मोर्चेबांधणी सुरू झाली आहे. आपल्या पक्षाचा प्रचार आणि प्रसार करण्यासाठी अनेक नेते महाराष्ट्राचा दौरा देखील करत आहेत. त्यात आता मनसे अध्यक्ष राज ठाकरे (Raj Thackeray) सुद्धा राज्याचा दौरा करणार आहेत. येत्या १४ डिसेंबर रोजी राज ठाकरे औरंगाबाद येथे येणार असून मारठवड्याचा दौरा करणार आहेत. मात्र राज ठाकरे यांच्या दौऱ्यापूर्वीच मनसे (MNS) पक्षाला गळती लागल्याचे दिसत आहे.

गुरुवारी औरंगाबाद येथे मनसेच्या अनेक नेत्यांनी व पदाधिकऱ्यांनी शिवसेनेत प्रवेश केला आहे. शिवसेनेचे आमदार अंबादास दानवे (Ambadas Danve) यांच्या पुढाकारातून औरंगाबादचे पालकमंत्री सुभाष देसाई (Subhash Desai) यांच्या उपस्थितीत शिवसेना पक्षप्रवेश सोहळा पार पडला आहे. औरंगाबादमध्ये आता मनसेचा फारसा प्रभाव राहिला नसल्याचे चित्र यातून दिसत आहे. मनसेचा प्रभाव पुन्हा एकदा वाढवा यासाठीच राज ठाकरे औरंगाबाद दौरा करणार आहेत, मात्र दौऱ्यापूर्वीच अनेक नेत्यांनी मनसेची साथ सोडत शिवसेनेचा हात धरला आहे.

शिवसेना (Shivsena) पक्षप्रवेश कार्यक्रमाच्या वेळेस पालकमंत्री सुभाष देसाई यांनी मनसेवर टीका केली आहे. मनसे गळकं घर असल्याने मनसेचे पदाधिकारी स्वगृही परतत आहेत. कारण शिवसेनेचा वाडा गळका नाही. इथे प्रवेश मिळतो, पण बाहेर जाण्यासाठी कोणी दरवाजा उघडत नाही. शिवसेनेचा वाडा चिरेबंदी आहे, अशा शब्दात सुभाष देसाई यांनी मनसेवर टीका केली आहे. सुभाष देसाई यांच्या सुरात सूर मिसळत मनसेच्या पदाधिकाऱ्यांनीही मनसेवर टीका केली. मनसे नवीन घर आहे, म्हणून आम्ही त्यात प्रवेश केला होता. पण तिथे थंडीत कुडकुडण्याशिवाय दुसरे काहीच हाती लागले नाही, त्यामुळे आम्ही जुन्या घरात परत आलो, असे पदाधिकारी म्हणाले. एकंदरीतच आता निवडणुकीच्या तोंडावर मनसे समोर मोठे आव्हान असल्याचे दिसत आहे.

महत्वाच्या बातम्या:

• ‘२०२४ मध्ये बदल हवाच, उघड दार देवा आता उघड दार देवा…’
• कम्युनिस्ट पक्षाच्या नेत्यांना इंदिरा गांधी यांनी १९ महिने तुरुंगात डांबले होते – अतुल भातखळकर
• राज्यात होणारे ॲानर किलींग सरकारसाठी आणि पोलिस यंत्रणेसाठी निंदास्पद- चित्रा वाघ
• ‘शिवसेनेने सत्तेसाठी तुमच्याशी सोयरिक केली हे आव्हाडांनी बरं खपवून घेतलं’
• ‘सुप्रियाताई केंद्राच्या खांद्यावर बंदूक ठेवण्याऐवजी ‘हा’ सल्ला अजितदादांना द्या’