सोनारीचे जवान तोडकरी यांना पठाणकोट येथे वीरगती, भावपूर्ण वातावरणात अंत्यसंस्कार

उस्मानाबाद : शूरवीर सागर तोडकरी या जवानावर मंगळवारी सायंकाळी ६ वाजता परंडा तालुक्यातील सोनारी येथे भावपूर्ण वातावरणात शासकीय इतमामात अंत्यसंस्कार करण्यात आले. सोनारी गावातून फुलांनी सजवलेल्या वाहनातून जवान तोडकरी यांची अंत्ययात्रा काढण्यात आली. यावेळी जवानास श्रद्धांजली वाहण्यासाठी पंचक्रोशीतील तरुणांनी व ग्रामस्थांनी मोठी गर्दी केली होती.

सोनारी येथील सागर पद्माकर तोडकरी (३०) या जवानास पंजाबमधील पठाणकोट येथे कर्तव्यावर असताना १४ फेब्रुवारी झालेल्या अपघातात वीरगती प्राप्त झाली. त्यांच्या पश्चात आई, वडील, बहीण, पत्नी, मुलगा, मुलगी असा परिवार आहे. मंगळवारी (दि.१६) पुणे येथून सोनारी येथे तोडकरी यांचे पार्थिव शासकीय वाहनातून आणण्यात आले. सोनारी गावातून फुलांनी सजवलेल्या वाहनातून अंत्ययात्रा काढण्यात आली. मिरवणूक मार्गावर विविध ठिकाणी “वीर जवान, तुझे सलाम’ लिहिलेल्या रांगोळ्या काढण्यात आल्या होत्या. गावातील मुख्य चौकात तरुण मोठ्या संख्येने जमा झाले होते.

जवानाच्या पार्थिवावर गावच्या शेतातील घराजवळ अंत्यसंस्कार करण्यात आले. यावेळी अहमदनगर येथील एमआयआरसी ट्रेनिंग सेंटरचे कॅप्टन रूपेशकुमार यांच्यासह २२ जणांनी जिल्हा पोलिस प्रशासनाच्या वतीने सलामी देऊन व पुष्पचक्र अर्पण करून सन्मान करण्यात आला. यावेळी आमदार प्रा. डॉ. तानाजी सावंत, माजी आमदार ज्ञानेश्वर पाटील, जि.प. माजी अध्यक्ष बाळासाहेब पाटील हांडोग्रीकर आदींसह विविध क्षेत्रांतील मान्यवर उपस्थित होते.

महत्त्वाच्या बातम्या

• ‘जवळजवळ बाटलीबंद होत आलेले कोरोनाचे भूत पुन्हा बाहेर येते की, काय ?’
• कुमारस्वामींनंतर आता सिद्धारामैय्यांचा देखील राम मंदिराला देणगी देण्याला विरोध
• टूलकिट प्रकरणात नवनवीन नावांचा समावेश; अनिता लाल पोलिसांच्या रडारवर
• सलग नवव्या दिवशी इंधन दरवाढ कायम; सर्वसामान्य चिंतेत !
• इंग्लंड की कुटाई हो गई ! ‘या’ खेळाडूकडून टीम इंडियाच अभिनंदन !