वैद्यकीय महाविद्यालयाच्या प्रश्नावर परभणी शिवसेना आक्रमक, खासदारांची आंदोलनाची भूमीका

परभणी : शासकीय वैद्यकीय महाविद्यालय तत्काळ मंजूर करीत कार्यान्वित करावे या मागणीसाठी शिवसेनेचे खासदार संजय जाधव यांनी आता निर्णायक लढाई लढण्याचा निर्णय जाहीर केला आहे. या संदर्भात २१ ते ३१ ऑगस्ट दरम्यान जिल्ह्यामध्ये विविध ठिकाणी आंदोलने करण्यात येणार आहे. या नंतरही या प्रकरणी निर्णय झाला नाही, तर सात सप्टेंबर पासून उपोषण करण्याचा इशाराही खासदार संजय जाधव यांनी दिला आहे.

या संदर्भात खासदार जाधव यांनी त्यांची भूमीका स्पष्ट केली आहे. ते म्हणाले की, ‘शासकीय वैद्यकीय महाविद्यालय स्थापनेसंदर्भात आपण राज्याचे मुख्यमंत्री उद्धव ठाकरे तसेच आरोग्य विभागाचे सचिव यांच्या गाठीभेटी घेतल्या. परभणीत शासकीय वैद्यकीय महाविद्यालय तत्काळ स्थापन करावे त्या दृष्टिकोनातून संपूर्ण प्रक्रिया सुरू करावी अशी मागणी केली. दरम्यान या प्रश्नावरच २१ ते ३१ ऑगस्ट दरम्यान संपूर्ण जिल्ह्यात स्वाक्षरी मोहीम राबविणार आहोत. एक ते सहा सप्टेंबर या दरम्यान या मागणीसाठी आंदोलने केली जाणार आहेत. विशेषतः धरणे, निदर्शने तसेच रास्ता रोको आंदोलन केले जाईल. याउपरही राज्य सरकारने याकडे दुर्लक्ष केल्यास सात सप्टेंबर पासून आपण उपोषण सुरू करू.’

परभणीमध्ये शासकीय वैद्यकीय महाविद्यालयाची मागणी गेल्या अनेक वर्षांपासून करण्यात येत आहे. त्यासाठी शिवसेनेने देखील पाठपुरावा केला होता. मात्र, आता राज्यात शिवसेनेची सत्ता असतानाही हा प्रश्न मार्गी लागलेला नाही. त्यामुळे आता शिवसेनेचे खासदारच आक्रमक झाले आहेत. त्यांच्या या आक्रमक भूमीकेला पालकमंत्री नवाब मलिक यांच्यासोबत असलेल्या वादाची किनारही आहे.

महत्त्वाच्या बातम्या

• लोकप्रिय मुख्यमंत्र्यांमध्ये उद्धव ठाकरे टॉप फाईव्हमध्ये!
• शर्यतीत सहभागी होण्याचे आवाहन करण्यासाठी पडळकरांनी हाकली बैलगाडी, पाहा व्हिडिओ
• ‘राज्यपालांनी स्वतःचा पाय पुन्हा धोतरात गुंतवून घेतला’, संजय राऊतांची टीका
• ‘हिंदू हो तो डर के रहो.. ये है उद्धव का नया महाराष्ट्र!’, नितेश राणेंचा हल्लाबोल
• ‘कोमार्य चाचणी विषय राष्ट्रीय पातळीच्या अभ्यासक्रमातून वगळावा’, अंनिसचे मंत्री भारती पवारांना निवेदन