पुणे : मनसेचे राज्य सरचिटणीस हेमंत संभूस हे आता मशिदीवरील भोंग्याच्या मुद्द्यावर अधिक आक्रमक झालेले आहेत. मनसेने पोलिसांना अल्टीमेटम दिले आहे. त्यामुळे भोंग्यांचा मुद्दा अद्याप संपला नसल्याचे असेच दिसून येत आहे.
हेमंत संभूस यांनी पुणे पोलिसांना एक पत्र दिले आहे. मशिदीवरील भोंगे हे चार दिवसात हटवण्यात यावेत नाहीतर आम्ही दुप्पट आवाजात हनुमान चालिसा लावणार असल्याचे स्पष्ट केले आहे. पुणे शहर मनसेकडून शहरातल्या विविध पोलीस ठाण्यांना पत्र पाठवण्यात आले आहेत. डेक्कन परिसरातील विविध मशिदीवरील भोंगे काढण्यासाठी हे पत्र देण्यात आले आहेत.
दरम्यान मनसेचे शहराध्यक्ष वसंत मोरे यांनी कालच हनुमान चालिसा लावण्याबद्दल संधिग्दता व्यक्त केली होती, तर आज मनसे सरचिटणीस यांनी आक्रमक भूमिका घेतली आहे. यामुळे पुणे शहर मनसेमध्ये दोन गट पडले आहेत का या प्रश्नाची चर्चा होत आहे.
