बोगस बियाण्यांमुळे शेतकरी अडचणीत, उत्कृष्ट बियाणे उपलब्ध करून देण्याची मागणी!

🕒 1 min read

औरंगाबाद : बोगस बियाणांमुळे मराठवाड्यातील शेतकरी अडचणीत आला आहे. ऐन पेरणीच्या वेळेसच नामांकित बियाण्यांची टंचाई निर्माण का होते. असा प्रश्‍न शेतकर्‍यांसमोर उभा राहिला आहे. केवळ नफेखोरीसाठी काही व्यावसायिक हा प्रकार करत असल्याचे बोलल्या जात आहे. यामुळे शेतकर्‍यांमध्ये मोठा संताप निर्माण होत असून उत्कृष्ट दर्जाच्या कंपनीचे बियाणे उपलब्ध करून देऊन शेतकर्‍यांची होणारी परवड थांबवण्याची मागणी होत आहे.

गत वर्षी समाधानकारक पाऊस झाला असल्याने शेतकर्‍यांकडुन सोयाबीनची मोठ्या प्रमाणात पेरणी करण्यात आली होती. मात्र, यामध्ये किर्तीमान व यशोदा या कंपन्याचे बियाणे हे निकृष्ट दर्जाचे निघून सोयाबीन दुबार पेरणी करूनही उगवले नसल्याने हे प्रकरण उच्च न्यायालयामध्ये गाजले होते. त्यामुळे यावर्षी शेतकरी सतर्क झाले असून बियाणाची चौकशी करूनच बियाणे घेत आहेत.

यावर्षी पावसाचे उशिरा आगमन झाल्याने शेतकरी चिंताग्रस्त दिसत आहेत. दोन दिवसापूर्वी पावसाने परिसरात हजेरी लावल्याने बळीराजाने आपला मोर्चा बी- बियाणे खरेदीसाठी वळवला आहे. सोयाबीनचे पीक कमी खर्चात येत असल्याने सोयाबीनचा पेरा वाढला आहे.

अशा परिस्थितीत शेतकरी हे चौकशी करून सोयाबीनचे बियाणे घेत आहेत. यामध्ये अंकुर या सोयाबीन कंपनीच्या बियाण्यास शेतकर्‍याकडून मोठी मागणी असून या बियाण्याचा तुटवडा निर्माण झाला असून दुकानदार ते मागितल्यानंतर ते बियाणे नसल्याचे सांगत आहेत. त्याऐवजी दुसरेच बियाणे उपलब्ध असल्याचे सांगत आहेत. दरम्यान, सोयाबीनच्या बियाण्यांचा दर शंभर ते सव्वाशे रुपये किलो आहे.

एकरी सुमारे २५ ते ३० किलो बियाणे, हजार ते दीड हजार रुपये किंमतीचे रासायनिक खते, तसेच बैलाच्या सहाय्याने पेरल्यास एकरी तीन हजार रुपये तर ट्रॅक्टरच्या सहाय्याने पेरल्यास एकरी दोन हजार रुपये असे सुमारे एकरी पेरणीसाठी आठ ते दहा हजार रुपये खर्च येतो. असे असतानाही बोगस बियाणे उगवले नाही, तर शेतकर्‍यांना दुबार पेरणी करावे लागते.

महत्त्वाच्या बातम्या

• औरंगाबाद महापालिकेत पदभरतीचा मार्ग मोकळा, पालकमंत्री सुभाष देसाई यांचे निर्देश!
• जायकवाडीतून १ टिएमसी पाणी वॉटरग्रीड योजनेसाठी घेतल्यास शेती सिंचनाला फरक पडणार नाही- संदीपान भुमरे
• ‘अनिल देशमुख हे जेलमध्ये जाणारच; ते भुजबळांच्या मार्गावर’; भाजप नेत्याचं धक्कादायक विधान
• पुणेकरांनो काळजी घेण्याची हीच ती वेळ ; वाचा शहरातील कोरोना स्थिती
• संजय राऊतांच्या भेटीगाठी वाढल्या; नेमकं पडद्यामागे काय सुरु आहे ?