मुंबई : मुंबई भाजपच्या विद्यमान कार्यकारिणीच्या कार्यकाळातच मुंबई महापालिकेवर भारतीय जनता पार्टीचा झेंडा फडकेल, असा विश्वास व्यक्त करत भ्रष्टाचाराचे आगार असलेली मुंबई महापालिकेची सत्ता २०२२ मध्ये उलथवून लावायची, असे निर्देश भाजपाचे नेते तथा विधानसभेचे विरोधी पक्षनेते देवेंद्र फडणवीस यांनी दिले. या माध्यमातून फडणवीस यांच्या नेतृत्वात भाजपाने बिहारनंतर आता ‘मिशन मुंबई’ सुरू केले आहे.
देवेंद्र फडणवीसांनी शिवसेनेवर टीका केल्यानंतर शिवसेनेचे नेते व खासदार संजय राऊत यांनी भाजपवर पलटवार केला आहे. ‘भाजपने मिशन, कमिशन काहीही सुरु करावं. त्यांना बीएमसीमध्ये इंटरेस्ट आहे कारण त्यांना मुंबईमध्ये इंटरेस्ट आहे, त्यांना मुंबईच्या जमीनीत उत्सुकता आहे, मुंबईच्या आर्थिक उलाढालीत, शेअर बाजारात इंटरेस्ट आहे . हे गेले पन्नास वर्षे सुरु असून त्यांना मुंबईला दिल्लीची गुलाम-पायपुसणं करायचं आहे आणि आम्ही ते होऊ देत नाही याचं त्यांना दुःख आहे,’ असा घणाघात संजय राऊत यांनी केला आहे.
यासोबतच, ‘भाजपला मुंबई विकायची आहे, घशात घालायची आहे. पण आमचं म्हणणं आहे की, मुंबई श्रमिकांची, मराठी माणसांची, कष्ट मजुरांची आहे मात्र उद्योगपतींची नाही. त्यांना जर मुंबई ओरबाडायची असेल तर आमचा विरोध आहे.’ तसेच, ‘शंभर पिढ्या जरी खाली उतरल्या तरी मुंबई पालिकेवर जो भगवा फडकतोय, तो उतरवायचं सोडाचं हात लावण्याची देखील हिम्मत नाही. तुमचे हात जाळून खाक होतील. एवढी आग त्या भगव्यामध्ये आहे,’ असं देखील त्यांनी भाजपला ठणकावलं आहे.
राजाचा जीव पोपटात, तर काहींचा जीव मुंबई महापालिकेत आहे- देवेंद्र फडणवीस
राजाचा जीव पोपटात, तर काहींचा जीव मुंबई महापालिकेत आहे. आता औदार्य नाही, प्रत्येक वार्डात, बूथमध्ये नेता नेमणार. प्रत्येक बूथमध्ये राजकीय कार्यकर्ते घडवा. युवा मोर्चाने प्रत्येक बूथमध्ये 50 युवा आणि महिला मोर्चाने 100 घरात महिलांना जोडलं पाहिजे. ज्याच्या डोक्यात सत्ता गेली त्याचं पतन निश्चित आहे. जनतेसाठी तो माज तोडावाच लागेल. 2022 साली मुंबई महानगरपालिकेवर भगवाच फडकेल, पण भाजपचा, असा आत्मविश्वास देवेंद्र फडणवीसांनी व्यक्त केला.
महत्वाच्या बातम्या
- मंत्री गुलाबराव पाटील ‘या’ नवसाची पूर्ती करण्यासाठी आले शिर्डीच्या साई दरबारी!
- ‘राजाचा जीव पोपटात, तर काहींचा जीव मुंबई महापालिकेत आहे’
- कौतुक आणि टीकेचं मी स्वागत करते,तुमच्यासाठी नवीन काहीतरी घेऊन मी पुन्हा येईन : अमृता फडणवीस
- वाढीव वीज बिलाच्या मुद्द्यावर जनतेला दिलासा देण्यासाठी रस्त्यावर संघर्ष करावाच लागेल : मनसे
- अनुदानाच्या श्रेयासाठी पाथर्डी तालुक्यात राष्ट्रवादी-भाजप-शिवसेनेत रस्सीखेच!
