राणा दाम्पत्यानी आंदोलनातून पळ काढला; संजय राऊतांचा टोला 

🕒 1 min read

मुंबई:  राज्यात सध्या हनुमान चालीसावरून चांगलेच राजकारण पेटले आहे. मनसे अध्यक्ष राज ठाकरे यांनी घेतलेल्या मशिदीसमोर हनुमान चालीसा लावण्याच्या भूमिकेला खासदार नवनीत राणा आणि आमदार रवी राणा (Ravi Rana) यांनी समर्थन करत मुख्यमंत्री उद्धव ठाकरेंच्या मातोश्री निवासस्थाना समोर हनुमान चालिसा पठण करण्याचा इशारा दिला होता. त्यामुळे गेल्या दोन दिवसांपासून याच्याच चर्चा अधिक रंगत होत्या. मात्र आज (२३ एप्रिल) दुपारी पत्रकार परिषद घेत राणा दाम्पत्यानी आंदोलन थांबवण्याची घोषणा केली आहे. यावरूनच शिवसेना खासदार संजय राऊत (sanjay raut) यांनी राणा दाम्पत्यानी आंदोलनातून पळ काढला, असा टोला लगावला आहे.

“मोदींच्या दौऱ्याला गालबोट लागेल म्हणून माघार घेतल्याचा राणा दाम्पत्याचा दावा सपशेल खोटा आहे. हिंदुत्वाच्या नावाने भाजपच्या काही लोकांनी यांच्या खांद्यावर बंदूक ठेऊन शिवसेनेवर हल्ला केला. काल आणि आज यांना मातोश्रीवर घुसून काही वेगळे कारस्थान करायचा यांचा डाव होता. हनुमान चालीसा वाचायची होती तर अनेक आध्यात्मिक जागा आहेत, त्यासाठी मातोश्री निवडणे आणि दंगल परिस्थिती निर्माण करणे, हे कुणाचे कारस्थान आहे? यांचा हिंदुत्वाशी संबंध काय आहे? श्री रामाचे नाव घेण्याला या बंटी आणि बबलीचा विरोध होता. अयोध्या आंदोलनाला यांचा विरोध होता आणि आज हे लोक हनुमान चालीसा अशी भाषा वापरून महाराष्ट्रापुढे आव्हान निर्माण करत आहेत. मात्र शिवसेनेचे हिंदुत्व घंटा धारी नसून गदा धारी आहे.”, असा इशारा संजय राऊत यांनी दिला आहे.

दरम्यान आज दुपारी घेतलेल्या पत्रकार परिषदेत राणा दाम्पत्यानी आंदोलन थांबवण्याचा निर्णय जाहीर केला आहे. “राज्यात पोलिसांना सामान्य जनतेला त्रास होऊ नये आणि उद्या पंतप्रधान नरेंद्र मोदींचा प्रस्तावित मुंबई दौरा रद्द होऊ नये यासाठी आम्ही आंदोलन थांबवण्याचा निर्णय घेतला आहे”, असे रवी राणा यांनी म्हटले आहे.

महत्वाच्या बातम्या: 

• IPL 2022 DC vs RR : नो बॉल कॉन्ट्रोवर्सी..! इतकं रामायण घडताना ‘थर्ड अंपायर’ होता कुठं? वाचा नियम काय सांगतो!
• “महाराष्ट्राला अशांत करण्यासाठी काही विकृत मनोवृत्ती कामाला” ; रुपाली चाकणकरांची टीका
• IPL 2022 KKR vs GT : हार्दिक इज बॅक..! गुजरातनं जिंकला टॉस; कोलकाता संघात ‘तीन’ बदल!
• महाराष्ट्रात राष्ट्रपती राजवटीवर छगन भुजबळ यांची प्रतिक्रिया; म्हणाले…
• काही जणांनी भाड्याने घंटा धारी हिंदुत्व स्वीकारले मात्र शिवसेनेचे हिंदुत्व गदा धारी आहे- संजय राऊत