अहमदनगर/ऋषिकेश घोगरे:- शिर्डी येथील साईबाबा मंदिर गेल्या सहा महिन्यांपासून बंद आहे. राज्यातील मंदिरे तसेच प्रार्थनास्थळे खुली झाली तर राज्य सरकारच्या तिजोरीत भर पडणार आहे. शिर्डी येथील साईबाबांचे मंदिर बंद असल्याने येथील अर्थकारण ठप्प झाले असून व्यावसायिकांचे मोठ्या प्रमाणात नुकसान होत आहे. साई मंदिर दर्शनासाठी खुले करावे, संस्थानच्या कर्मचाऱ्यांचे पगार कपात करू नये, या मागण्यांसाठी महाराष्ट्र नवनिर्माण सेनेचे नेते बाळा नांदगावकर यांच्या नेतृत्वाखाली कार्यकर्त्यांनी साष्टांग दंडवत घालत साईबाबांना साकडे घातले.
शिर्डीचे साईबाबा मंदिर खुले करण्यासाठी महाराष्ट्र नवनिर्माण सेनेने नगर-मनमाड महामार्गावरून मोर्चा काढून घोषणाबाजी करत मनसे नेते बाळा नांदगावकरांसह शेकडो कार्यकर्ते प्रवेशद्वार क्रमांक चार लगत जमा झाले होते. ह्या मोर्चाला पोलिसांनी रोखले व बाळा नांदगावकर यांच्यासह पाच जणांना आत प्रवेश देण्यात आला.
साईबाबा मंदिरासमोर नांदगावकर यांनी साष्टांग दंडवत घातल्यावर त्यांच्यासह पाच पदाधिकाऱ्यांनी संस्थान प्रशासकीय इमारतीमध्ये जाऊन संस्थानचे मुख्य कार्यकारी अधिकारी के.एच.बगाटे यांची भेट घेतली. या भेटीत साई मंदिर खुले करण्यासाठी तसेच कर्मचाऱ्यांचे प्रश्न सोडविण्यासाठी सकारात्मक चर्चा झाली असल्याचे बाळा नांदगावकर यांनी सांगितले.
यावेळी मनसेचे संपर्क अध्यक्ष अनिल चितळे, उत्तर नगर जिल्हाध्यक्ष दत्तात्रय कोते, तालुकाध्यक्ष राजेश लुटे, विजय मोगले, गणेश जाधव, लक्ष्मण कोतकर, सचिन डफळ, देविदास खेडकर, सलीम शेख, नगरसेवक योगेश शेवरे, गणेश जाधव, विकी कांबळे, राहुल देशमुख, कैलास भुजबळ आदींसह राहता तसेच कोपरगाव तालुक्यातील मनसेचे कार्यकर्ते उपस्थित होते.
महत्वाच्या बातम्या:-
- महाराष्ट्रातील मराठा खासदार आरक्षणासाठी मोदींना निवेदन देणार- खा.छत्रपती संभाजीराजे
- संगमनेरमध्ये माझे कुटुंब माझी जबाबदारी अभियान प्रभावीपणे राबवा- बाळासाहेब थोरात
- मोदींच्या अहंकारी स्वभावामुळे कोरोनाचा उद्रेक-राहुल गांधी
- अकोले तालुक्यात कोरोनाने थैमान घातलेले असताना, लोकप्रतिनिधी कुठे आहेत?- वैभव पिचड
- मराठा आरक्षणाचा अध्यादेश काढता येत नाही- श्रीहरी अणे
