एक पठ्या निघालाय थेट सूर्यावर केस करायला, जाणून घ्या का ?

टीम महाराष्ट्र देशा : सूर्याच्या उष्णतेने संतापलेल्या एका व्यक्तीने थेट ‘सूर्या’विरोधात कारवाई करा अशी मागणी केली आहे. मध्य प्रदेशातल्या शाजापूर जिल्ह्यात ही घटना असून शिवपाल सिंह असे त्या व्यक्तीचे नाव आहे.

यंदाच्या वर्षी उष्णतेची प्रखर लाट होती. गेल्या अनेक वर्षात नव्हतं एवढं उन्ह यावर्षी अनुभवायला मिळालं. महाराष्ट्रातील अनेक जिल्ह्यांमध्ये प्रखर उष्णतेची लाट पाहायला मिळाली. या प्रखर उष्णतेमुळे नागरिक घामाच्या धारांनी त्रासून गेले होते तर अनेक जणांचे प्राणही गेले होते.

याचदरम्यान, मध्यप्रदेशातल्या अशाच एका उष्मा पीडित नागरिकाने थेट ‘सूर्या’विरोधात कारवाई करावी अशी मागणी केली आहे. दिवसेंदिवस ‘सूर्या’चा प्रकोप वाढतोय, भीषण गर्मी आहे, जगण असह्य झालंय, अनेकांचा जीव गेलाय, अशा परिस्थितीत जगायचं कसं? असा सवाल शिवपाल सिंह या नागरिकाने पोलिसांना विचारला. इतकेच नव्हे तर, सूर्या’विरुद्ध तातडीने कारवाई करावी अशी मागणीही त्यांनी केली आहे.

विशेष म्हणजे, पोलिसही या तक्रारीमुळे अचंबित झाले आहेत. आता ‘सूर्या’विरुद्ध कुठल्या कलमाखाली कारवाई करायची असा प्रश्न पोलिसांना पडला आहे.