मालेगाव : मालेगाव शहराला कोरोनामुक्त करण्यासाठी प्रशासनातील प्रत्येक अधिकाऱ्याने त्यांना प्रदान केलेल्या अधिकाराचा पुरेपूर वापर करावा, भविष्यातील धोके ओळखून सोपविलेल्या जबाबदारीचे काटेकोर नियोजन करावे. अशा सुचना आपत्ती व्यवस्थापन प्राधिकरणाचे अध्यक्ष तथा जिल्हाधिकारी सूरज मांढरे यांनी आज दिल्या.
सोशल डिस्टन्सींग चे अनुपालन होण्याच्या उद्देशाने मालेगाव येथील विश्रामगृहाच्या आवारातील मोकळ्या जागेत उपस्थित सर्व विभाग प्रमुखांचा आढावा घेतांना जिल्हाधिकारी मांढरे बोलत होते. यावेळी इमर्जन्सी ऑपरेशन सेंटरचे प्रमुख डॉ.पंकज आशिया, अपर जिल्हाधिकारी धनंजय निकम, अतिरीक्त मुख्यकार्यकारी अधिकारी रविंद्र शिंदे, अपर पोलिस अधिक्षक संदीप घुगे, प्रातांधिकारी विजयानंद शर्मा, आयुक्त किशोर बोर्डे, उपायुक्त नितीन कापडणीस, तहसिलदार चंद्रजित राजपूत, शिवकुमार आवळकंठे, डॉ.गोविंद चौधरी यांच्यासह सर्व विभागाचे प्रमुख उपस्थित होते.
पुढे बोलतांना जिल्हाधिकारी मांढरे म्हणाले, सामान्य रुग्णालय हे आता यापुढे नॉन कोवीड रुग्णालय असणार आहे. कोरोनाचा प्रादुर्भाव रोखण्यासाठी विविध विभागांमार्फत करण्यात येणाऱ्या कामांचा आढावा घेतांना ते म्हणाले, प्रतिबंधात्मक उपाययोजना अधिक प्रभावीपणे राबविण्यासाठी लगतच्या पाचही तालुक्यांमधील शासकीय वाहनांसह कर्मचाऱ्यांची सेवा तात्काळ अधिग्रहीत करण्यात यावी. रुग्ण दाखल होण्यापूर्वीच त्याचे सिडीआर सह कॉन्टॅक्ट ट्रेसिंग अपेक्षीत आहेत. महानगरपालिकेमार्फत गठीत करण्यात आलेल्या समितीला सर्वतोपरी सहकार्य मिळेल. जिल्हा परिषदेच्या आरोग्य विभागाच्या आस्थापनेवरील पाचही तालुक्यातील कर्मचाऱ्यांच्या टिम तयार करून मालेगाव तालुक्यातील सर्व चेकपोस्टवर नियुक्त करण्याच्या सुचना त्यांनी दिल्या.
याबरोबरच क्वारंटाईन करण्यात येणाऱ्या रुग्णांचे वर्गीकरण, मोबाईल शौचालय, बॅरिकेट्स, नव्याने दाखल होणाऱ्या रुग्णांसाठी क्वारंटाईनची सुविधा, निर्जतुकीकरण, फवारणी, साईनेजेस, अत्यावश्यक वस्तुंचा पुरवठा आदिंचा विभाग निहाय आढावा घेतांना येणाऱ्या रमजान पर्वाच्या अनुषंगाने मुस्लीम बांधवांसाठी आवश्यक सोयी सुविधांबाबतही सुक्ष्म आराखडा तयार करण्याचे निर्देश त्यांनी दिले. कोवीड केअर सेंटर मधील आरोग्य कर्मचाऱ्यांची विशेष काळजी घेऊन त्यांनाही चांगल्या सुविधा उपलब्ध करून देण्याचे त्यांनी सांगितले. तर अधिग्रहीत करण्यात आलेल्या खाजगी आरोग्य सेवा नाकारणाऱ्यांचे समुपदेशन करावे, हा लढा केवळ शासकीय सामग्रीच्या वापराने पूर्ण होणार नाही तर जगभरामध्ये सर्व खाजगी संस्था खासगी डॉक्टरर्स या लढाईमध्ये उतरले आहेत. तसाच प्रतिसाद आपल्या इथून देखील मिळत आहे तो अधिक वाढवावा असे आवाहन त्यांनी केले.
काल जिल्ह्याचे एकूण 166 अहवाल निगेटिव्ह आले, ही जिल्ह्याच्या दृष्टीने चांगली गोष्ट आहे. तसेच कोरोनातून बरे होणाऱ्यांचे प्रमाणही मोठ्या प्रमाणात आहे. त्यामुळे कुणीही घाबरण्याचे कारण नाही. नाशिक मध्ये कोरोना चाचणीसाठी स्वतंत्र लॅब मंजूर झाली आहे. परवापासून ती कार्यान्वित होऊन लवकरात लवकर कोरोनाचे निदान व उपचार होणार असल्यामुळे तपासणीला गती मिळणार आहे. अजुनही लोक उशिरा दवाखान्यात येत असल्याचे दिसून येत आहे. त्यामुळे थोडे जरी लक्षणे नागरिकांना दिसून आल्यास त्यांनी तात्काळ आरोग्य प्रशासनाशी संपर्क साधण्याचे आवाहन त्यांनी केले. मालेगाव शहरात आता अत्यावस्त रुग्ण नसल्यामुळे परिस्थिती नियंत्रणात आहे. प्रशासनातील प्रत्येक अधिकारी, कर्मचारी, पोलिस अधिकारी, कर्मचारी तसेच आरोग्य विभागातील प्रत्येक घटक, जिल्हा परिषद व सर्वच शासकीय अधिकारी, कर्मचारी यासाठी अहोरात्र झटत आहेत. यांच्या जोडीला नागरिकांची साथ मिळाल्यास या लढ्यात आपण नक्कीच यशस्वी होऊ असा विश्वासही त्यांनी यावेळी व्यक्त केला.
बातम्यांसाठी YouTube चॅनेल Subscribe करा
Subscribe Now
