टीम महाराष्ट्र देशा : मका पिकावर येणारी अमेरिकन लष्करी अळीचे यंदा संकट आहे. या अळीचा बंदोबस्त करण्यासाठी एकात्मिक व्यवस्थापन करा, खबरदारी म्हणून पाच जुलैपूर्वी मक्याची पेरणी करा, असे आवाहन औरांगाबादचे जिल्हाधिकारी उदय चौधरी व जिल्हा अधिक्षक कृषी अधिकारी तुकाराम मोटे, कृषी विकास अधिकारी आनंद गंजेवार यांनी केले आहे.
अमेरिका, आफ्रिका असा प्रवास करत आलेल्या लष्करी अळीचे संकट मोठे आहे. मका पिकावर प्रामुख्याने पडणारी ही अळी ज्वारीसह इतर पिकांनाही लक्ष करते. सुमारे ८० पेक्षा जास्त वनस्पतीवर ही अळी जगू शकते. या अळीमुळे मक्याचे २० ते ६० टक्के नुकसान होते. औरंगाबादसह जालना व शेजारी बुलढाणा जिल्ह्यात प्रामुख्याने मका पिकाचे उत्पादन घेतले जाते.
औरंगाबाद तालुक्यातील चौका, खुलताबादेतील गदाना, सालुखेडा, कन्नड तालुक्यातील रिठ्ठी या गावांमध्ये लष्करी अळीचा प्रादुर्भाव आढळून आला आहे. बीज प्रक्रिया केलेल्या सुमारे ३५ टक्के बियाण्यांची यंदा विक्री झाली, अशी माहिती डॉ. मोटे यांनी देताना आतापर्यंत जिल्ह्यात मक्याचा सुमारे पन्नास टक्के पेरा झाला आहे. ज्यांनी अद्याप पेरणी केली नाही त्यांनी सायन्ट्रॅनिलीप्रोल आणि थायोमिथॉक्झॅम या कीडनाशकाची बीज प्रक्रिया केलेले बियाणे खरेदी करावे, जर विना बीजप्रक्रिया बियाणे खरेदी केले असेल तर, या कीडनाशकाची खरेदी करून बियाण्यास बीज प्रकिया करूनच लागवड करावी, असे आवाहन त्यांनी केले आहे.
हे उपाय करा
मका लागवडीनंतर ही अळी हल्ला करते. त्यामुळे पेरणीपासूनच दक्ष राहा. निंबोळी अर्काची व बीटी या जैविक तसेच बुरशीजन्य कीटकनाशकाची फवारणी करा. आवश्यकेतनुसार रासायनिक कीटकनाशकची फवारणी करा, कामगंध सापळा लावून नर पतंग मारा, जमिनीवर गुळाचे पाणी फवारा, प्रकाश सापळे लावा, मक्याच्या चार ओळीनंतर तूर, मूग, उडीद या पिकाच्या दोन ओळी घ्याव्यात. मक्याभोवती चवळीची लागवड करा, एकात्मिक किड व्यवस्थापन करा, असे आवाहन करण्यात आले आहे.
बातम्यांसाठी YouTube चॅनेल Subscribe करा
Subscribe Now
