बीड : मास्क न लावता फिरणाऱ्या दुचाकीस्वाराला पथकाने अडवले आणि अँटिजन चाचणी व दंडाची सूचना केली. यामुळे संतापलेल्या तरुणाने पथकातील अधिकाऱ्यांना अर्वाच्य भाषेत शिवीगाळ करत चाचणीला विरोध केला. ही घटना अंबाजोगाईतील सावरकर चौकात घडली. याप्रकरणी युवकाविरोधात गुन्हा दाखल झाला आहे.
विनाकारण फिरणाऱ्या लोकांची जबरदस्तीने अँटिजन चाचणी करण्याच्या मोहिमेला सोमवारपासून बीड जिल्ह्यात सुरुवात झाली. यासाठी अंबाजोगाई शहरात पाच पथकांची नियुक्ती करण्यात आली आहे. सकाळच्या सुमारास वेणुताई महिला महाविद्यालयासमोर तहसीलदार विपिन पाटील, मुख्याधिकारी अशोक साबळे, तालुका आरोग्य अधिकारी बालासाहेब लोमटे, महसूल व न.प.चे कर्मचारी, पोलिस हे अँटिजन टेस्ट ड्राइव्हची कारवाई करत होते.
यावेळी प्रवीण राजाभाऊ शेप (रा. शेपवाडी, ता. अंबाजोगाई) हा तरुण विनामास्क त्याच्या दुचाकीवरून (एमएच २० बीबी ९२७३) सावरकर चौकाकडून येत होता. पथकाने त्याला अडवून अँटिजन चाचणी आणि विनामास्क असल्याने दंड भरण्याबाबत सूचना केली. त्यामुळे संतापलेल्या प्रवीणने सर्व अधिकाऱ्यांना उद्देशून अर्वाच्य भाषेत शिवीगाळ केली. त्यामुळे रमेश सोनकांबळे यांच्या फिर्यादीवरून शासकीय कामात अडथळा निर्माण करणे, अधिकारी-कर्मचाऱ्यांवर दहशत निर्माण आणि अँटिजन चाचणीला विरोध केल्याप्रकरणी प्रवीण शेपवर अंबाजोगाई ठाण्यात गुन्हा दाखल झाला आहे.
महत्वाच्या बातम्या
- प.बंगालमधील हिंसाचाराच्या सीबीआय चौकशीसाठी भाजपने सुप्रीम कोर्टाचे दार ठोठावले
- मे महिन्यातील जेईई मुख्य परीक्षा स्थगित, शिक्षण मंत्र्यांची घोषणा
- ‘आरोग्य सेवेत मानवी चुका सहन झाल्या तर पाहा..’, मंत्री मुंडेंचा अधिकाऱ्यांना इशारा
- ‘कर्जासाठी बँका बंद, गांजा पेरण्यासाठी परवानगी द्या’, शेतकऱ्यांचे मुख्यमंत्र्यांना पत्र
- ‘स्वत:साठी घर बांधण्यापेक्षा लोकांचे जीव वाचवा’, प्रियंका गांधींची पंतप्रधान मोदींवर टीका
