टीम महाराष्ट्र देशा : मी मुख्यमंत्री व्हावे, असे प्रत्येकालाच वाटते. परंतु चार भिंतीच्या आत काम करायला मी काय कारकून आहे का? जे मला जमणार नाही ते मी करणारही नाही. मला जर मुख्यमंत्री व्हायचे असते तर तसे प्रयत्न मी केव्हाच केले असते आणि जर मुख्यमंत्री करायंचच होते तर पंधरा वर्षांपूर्वी करायचे होते. त्यावेळी केंद्रात आणि राज्यात आमचच सरकार होते असं म्हणत राष्ट्रवादीला घरचा आहेर खा. उदयनराजे भासले यांनी दिला आहे.
खासदार उदयनराजे भोसले यांनी गुरुवारी साताऱ्यात पत्रकार परिषद घेतली यावेळी विविध मुद्द्यांवर रोकठोक मते व्यक्त केली. नीरा देवघर धरणातील पाणीवाटपावरुन भोसले यांनी विधानपरिषदेचे सभापती रामराजे नाईक निंबाळकर यांच्यावर निशाणा साधला. स्वयंघोषित भगिरथाने जाणीवपूर्वक या भागातील कालव्यांची कामे रखडवल्याने हे तालुके हक्काच्या पाण्यापासून वंचित राहिले. स्वतःला भगीरथ म्हणवून घेणाऱ्यांनी सातारा जिल्ह्याचे पालकमंत्री असताना काहीच काम केले नाही. मंत्रीपदी असताना लाल दिव्याच्या गाडीचा वापर फक्त लोकांना हिणवण्यासाठी केला, त्यांना आता देवसुद्धा क्षमा करणार नाही असे सांगत भोसले यांनी रामराजे नाईक निंबाळकर यांच्यावर टीका केली.
