परभणी: एक महिन्यापुर्वी भंडारा जिल्ह्यात शासकीय रुग्णालयात आग लागली होती. या आगीत ८ नवजात बाळांचा होरपळून मृत्यू झाला होता. या घटनेनंतर प्रशासनाला जाग आली आणि जिल्हा रुग्णालयाचे ऑडीट सुरु झाले. पण ऑडीट म्हणजे नुसता दिखावा होता, आरोग्य विभाग अजुनही या प्रकरणाला गांभीर्याने घेत नाही असे दिसत आहे. याची प्रचिती परभणी येथे आली.
परभणी येथे जिल्हा शासकीय रुग्णालयात २४ तासात दोन वेळा आगीच्या घटना घडल्या. पहिली घटना ही शनिवारी रात्री १० च्या सुमारास घडली. या घटनेत अपघात विभागाच्या दुसऱ्या मजल्यावर आग लागली. या मजल्यावर असलेल्या जिन्यात ठेवलेल्या लाकडी सामानास आग लागली होती. तर दुसरी घटना रविवारी दुपारी ४.३० वाजता घडली. यावेळी रुग्णालयाच्या लॉंड्री रुमला आग लागली. सुदैवाने या दोन्ही घटनेत जीवितहानी झाली नाही. आग्निशामक दलाने तातडीने घटनास्थळी दाखल होऊन आग विझवली.
२४ तासांत घडलेल्या दोन्ही घटना गांभीर्याने घेत जिल्हाधिकारी दीपक मुगळीकर यांनी चौकशी समिती गठीत केली आहे. या समितीने तीन दिवसांत चौकशी अहवाल सादर करावा असे आदेश दिले आहेत. जिल्हा शल्यचिकित्सक डॉ. बाळासाहेब नागरगोजे यांच्यासह वैद्यकीय अधिकारी, नानलपेठ पोलिस ठाण्याचे पोलिस निरीक्षक कुंदनकुमार वाघमारे व कर्मचारी तातडीने घटनास्थळी दाखल झाले. जिल्हाधिकारी दीपक मुगळीकर यांनी रात्री जिल्हा शासकीय रुग्णालयात जाऊन पाहणी केली.
महत्वाच्या बातम्या
- ‘न्यायव्यवस्थेतील वातावरण शंका-कुशंका घेण्याच्या पलीकडे पोहोचले आहे’
- “पंतने आपला नैसर्गिक खेळ खेळणे सुरुच ठेवावे, त्यात कोणताही बदल करु नये”
- “कलाकार हे ऐकाकाळी भाई लोकांच्या इशाऱ्यावर चालत होते; केंद्र सरकारने भाईगिरी कधीपासून सुरु केली”
- नांदेड जिल्हा परिषदेच्या तीन जागांच्या पोटनिवडणुकीचे पडघम
- अशोक चव्हाणांनी आरक्षणात घोळ घालून विरोधकांना कागदपत्रे पुरवली – आमदार मेटे
