कोरोना म्हणजे तुमच्या पक्षाचे कार्यकर्ते नाहीत; राऊतांनी राज ठाकरेंना सुनावलं

मुंबई : राज्यात करोना रुग्णांची संख्या वाढत आहे. गर्दी टाळणं आणि मास्कचा वापर करणं हाच करोनापासून दूर राहण्याचा उत्तम उपाय असल्याचं सांगितलं जात आहे. मात्र, मनसे अध्यक्ष राज ठाकरे हे या काळात मास्क वापरत नसल्याचे अनेकदा दिसून आले आहे. मराठी भाषा दिनी मनसेच्या एका कार्यक्रमाला देखील ते विनामास्क हजर राहिले होते.

इतकच काय, विधानभवनात मुख्यमंत्री उद्धव ठाकरेंची भेट घ्यायला ते गेले होते. मात्र, विधानभवनात प्रवेशासाठी मास्कसह RTPCR कोरोना चाचणी अनिवार्य असल्याचे समजताच ते उद्धव ठाकरेंची भेट न घेताच परतले होते. यामुळे त्यांना मास्क घालण्याबाबत विचारलं असता त्यांनी अजब उत्तर दिलं. त्यांच्या या वक्तव्यामुळं उलटसुलट चर्चेला उधाण आलं आहे. महापालिका प्रशासन राज ठाकरे यांच्यावर काय कारवाई करणार, असा प्रश्न विचारला जात आहे.

तर, नाशिक दौऱ्यात देखील राज ठाकरे यांनी मास्क घातला नव्हता. तर, त्यांच्या स्वागतासाठी माजी महापौर अशोक मुर्तडक पोहोचले असता, यावेळी राज ठाकरे यांनी त्यांना मास्क काढा अशा सूचना केल्या. यावरून शिवसेनेचे नेते व खासदार संजय राऊत यांनी राज ठाकरेंना खोचक टोला लगावला आहे.

‘कोरोनाचे विषाणू काय आपल्या पक्षाचे कार्यकर्ते नाहीत. ते कोणालाही सोडत नाहीत. याच्यापासून तुम्हाला त्रास आहे आणि तुमच्यामुळे इतरांनाही त्रास आहे. अजित पवारांनी त्यांच्या भाषेत सांगितलं आहे. आपण सामाजिक जीवनात असताना भान बाळगलं पाहिजे,’ असं विधान संजय राऊत यांनी एका वृत्तवाहिनीशी बोलताना केलं आहे.

अरं बाबा… तुला काही कोरोना होणार नाही, पण…

राज्याचे उपमुख्यमंत्री अजित पवार यांनी राज ठाकरेंना खडे बोल सुनावले आहेत. ‘काही लोक तर सरळ म्हणतात मी मास्क घालणार नाही. अरं बाबा… तुला काही कोरोना होणार नाही. पण तुझ्यामुळे दुसऱ्याला होईल त्याचं काय ?’ अस म्हणत अजित पवारांनी नाव न घेता समाचार घेतला आहे.

महत्वाच्या बातम्या 

• ‘कोरोनाला संधी समजून आम्ही पेट्रोल-डिझेलवर कर लावला नाही याचा सार्थ अभिमान’
• धीरज देशमुखजी, मतदारसंघातील प्रश्न सोडवलात, राज्यातील इतर ग्रामपंचायतींचे काय?
• मनसुख हिरेन हे तर पट्टीचे स्वीमर,मग ते तलावात जीवन कसे संपवू शकतात?
• CBSE बोर्डाच्या दहावी-बारावीच्या परीक्षांमध्ये बदल; घ्या जाणून सुधारित वेळापत्रक!
• वाझेंच्या तपासावर फडणवीसांचा आक्षेप; देशमुख म्हणाले, हा अर्णबला आत टाकल्याचा राग !