टीम महाराष्ट्र देशा: लोकसभा निवडणुकीत पानिपत झाल्यानंतर आता कॉंग्रेसकडून आगामी विधानसभा निवडणुकीसाठी रणनीती आखण्यात येत आहे, मुंबईमध्ये या संदर्भात बैठक बोलवण्यात आली असून राज्यातील प्रमुख नेते, आमदार आणि पदाधिकारी बैठकीला उपस्थित आहेत. यामध्ये विधनासभा निवडणुकीत दिल्ली वा मुंबईतून उमेदवार न लादता स्थानिकांना एकमताने उमेदवार निश्चित करू द्यावे, अशी जोरदार मागणी कॉंग्रेस नेत्यांनी केली आहे.
दादर येथील टिळक भवन येथे कॉंग्रेसच्या राज्यव्यापी बैठकीला गुरुवारी सुरुवात झाली, भाजपकडून देवेंद्र फडणवीस तर शिवसेनेकडून आदित्य ठाकरे यांचे नाव मुख्यमंत्री पदासाठी पुढे करण्यात येत आहे, त्यामुळे कॉंग्रेसने देखील स्वच्छ प्रतिमेच्या नेत्याचे नाव मुख्यमंत्री पदासाठी पुढे करावे, अशी मागणी यावेळी करण्यात आली आहे.
दरम्यान, पक्षाची स्थिती बिकट बनली असून आता तरी नेत्यांनी एकमेकांतील गटबाजी थांबवा, अशी विनंती जेष्ठ कॉंग्रेस नेत्यांनी केली आहे.
