पिंपरी-चिंचवड : मंगळवारी रात्री ९ वाजता आणखी एका करोनाबाधीत व्यक्तीला डिस्चार्ज देण्यात आला आहे. या व्यक्तीच्या दोन्ही टेस्ट निगेटिव्ह आल्या असून भोसरी येथील रुग्णालयात त्याच्यावर उपचार सुरू होते. दरम्यान, या व्यक्तीला दोन आठवडे होम क्वारंटाईन राहण्यास सांगितलं आहे. त्यामुळे शहरात आत्तापर्यंत १० जण करोनामुक्त झालेले आहेत, तर दोघांवर उपचार सुरू आहेत.
दरम्यान, एका बाजूला ही आनंदाची बातमी येत असताना पिंपरी-चिंचवडकरांच्या आनंदावर विरजण टाकणारी सुद्धा बातमी समोर येत आहे.दिल्लीच्या निजामुद्दीन भागात काही दिवसांपूर्वी झालेल्या एका मोठ्या धार्मिक कार्यक्रमात सहभागी झालेल्यांमध्ये कोरोना व्हायरसची लक्षणे दिसू लागली आहेत. या तबलीगी जमातच्या कार्यक्रमात पुणे परिसरातील ९२ जण सहभागी झाल्याचे आढळून आले आहे. यापैकी ३५ जणांना नायडू हॉस्पिटलमध्ये दाखल करण्यात आले होते. आता त्यामध्ये पिंपरी-चिंचवड शहरातील तब्बल ३२ नागरिक सहभागी झाल्याची माहिती समोर आली असून त्यापैकी १४ जणांचा महापालिकेने शोध घेतला असून त्यांना रुग्णालयात दाखल केले आहे.
या व्यक्तींच्या त्यांच्या घशातील द्रावाचे नमुने उद्या ‘एनआयव्हीकडे’ तपासणीसाठी पाठविण्यात येणार आहेत. हे लोक किती जणांच्या संपर्कात आले असतील हे सांगणे कठीण आहे. आणखी १८ नागरिकांचा शोध घेण्याचे काम सुरू असल्याचे महापालिका आयुक्त श्रावण हर्डीकर यांनी सांगितले.
