कऱ्हाड : वहागाव येथील स्वस्त धान्य दुकानदाराने केलेला काळाबाजार समोर आल्यानंतर त्या दुकानदाराचा दुकान परवाना कायमचा रद्द करण्यात आला आहे. जिल्हा पुरवठा अधिकारी स्नेहा किसावे देवकाते यांच्या आदेशावरून हि कारवाई करण्यात आली आहे.
वहागाव येथील स्वस्त धान्य दुकानदार गौतम ताटे हा धान्य वितरणानंतर शासन नियम नुसार कुठलीही पावती देत नव्हता तसेच ग्राहक यादी त्याच्याकडे नव्हती व दुकानातील धान्य साठ्या विषयी फलक देखील त्याने लावलेले नव्हते. पावती पुस्तक देखील त्याने शासनाकडे सादर केलेले नव्हते, साथ बुकसह विक्रीरजिस्टर मध्ये खाडाखोड होती. शासनाची सही देखील त्यावर नव्हती या अनेक त्रुटींसह दुकानाची वेळ तसेच सुटीचा दिवसही लोकांना माहित नव्हता त्यामुळे ग्रामपंचायतीने ठराव करून ताटे यांचा परवाना रद्द करण्याची मागणी केली होती. शासनाने केलेल्या तपासणीत या बाबी खऱ्या असल्याचे समोर आले होते.
कोरोनासारख्या संकटाच्या परिस्तितीतही ग्राहकांची अशा प्रकारे फसवणूक सुरु होत असल्याने ताटे यांच्या दुकान परवान्याची शंभर टक्के अनामत रक्कम जप्त करून दुकान परवाना रद्द करण्यात आला.
