टीम महाराष्ट्र देशा: नीरा देवधरच्या पाण्यावरून राष्ट्रवादी कॉंग्रेस खासदार उदयनराजे भोसले यांनी रामराजे निंबाळकर यांच्यावर जोरदार निशाणा साधला होता, तर आता उदयनराजे यांना उत्तर देताना रामराजेंची जीभ घसरली आहे.
साताऱ्यात पिसाळलेली तीन कुत्री आहेत, ती जागेवर येईपर्यंत आपणही पिसाळलेलेचं राजकारण करू, असा इशारा देताना रामराजे निंबाळकर यांनी खा. उदयनराजे, खा. रणजितसिंह निंबाळकर आणि आ. जयकुमार गोरे यांची तुलना कुत्र्याशी केली आहे. दरम्यान, रामराजे यांच्या विधानामुळे नवीन वाद निर्माण होण्याची शक्यता आहे.
उदयनराजेंना आवरा, अन्यथा पक्षातून बाहेर पडू – रामराजे निंबाळकर
दरम्यान, यावेळी बोलताना रामराजे यांनी शरद पवारांनी उदयनराजेंना आवराव, अन्यथा आपण पक्षातून बाहेर पडू, असा इशारा दिला आहे. तसेच लोकसभा निवडणुकीनंतर कॉंग्रेस आ. गोरे मूळ पदावर येतील, असा टोलाही त्यांनी लगावला आहे.
लाल बत्तीचा वापर लोकांची खिल्ली उडवण्यासाठी – उदयनराजे
दुष्काळी भागाला पाणी देण्याचा अध्यादेश चौदा वर्षात का काढला नाही, असा सवाल करत उदयनराजे भोसले यांनी रामराजे निंबाळकर यांच्यावर टीका केली आहे. जिल्ह्याचे पालकमंत्री, कृष्णा खोऱ्याचे मंत्री तसेच स्वतःला भगीरथ समजणाऱ्याने फक्त लाल बत्तीचा वापर लोकांची खिल्ली उडवण्यासाठी केल्याचा टोला उदयनराजे यांनी लगावला आहे. जेव्हा आपण लाल बत्तीच्या गाडीतून फिरतो, पुढे मागे संपूर्ण खात्याचा उपभोग घेतो, संबंधित खात्याचे मंत्री म्हणून काम केले असते तर आज खंडाळा, फलटण, सांगोला आणि पंढरपुरच्या लोकांनी आशीर्वाद दिले असते, असही उदयनराजे म्हणाले.
बातम्यांसाठी YouTube चॅनेल Subscribe करा
Subscribe Now
