महाराष्ट्रात आरोग्यावर हवे अधिकचे काम, ७५ टक्के आमदारांचे मत

🕒 1 min read

मुंबई : गेल्या वर्षी नवी विधानसभा स्थापित होऊन सरकार कार्यरत होते न होते तोच राज्यात कोविडचे संकट आले. हे संकट हाताळल्यानंतर आता राज्यातील ७५.३ टक्के आमदारांना येत्या काळात आरोग्य या विषयावर अधिकचे काम करायला हवे असे वाटते. कोविडमुळे आपापल्या भागात बेरोजगारीत वाढ झाल्याचे मत ७२ टक्के आमदारांनी नोंदवले आहे.

धोरणअभ्यास व पाठपुरावा करणाऱ्या मुंबई येथील संपर्क संस्थेने ‘सन २०२० : आमदारांनी कोविड संकटाला दिलेला प्रतिसाद’ हा अहवाल आज गुरुवारी (दि.२५) प्रकाशित केला. या अभ्यासाद्वारे महाराष्ट्रातील आमदारांनी कोविड-१९ संकट गतवर्षात कशा प्रकारे हाताळले, हे जाणून घेण्याचा प्रयत्न ‘संपर्क’ने केला. या सर्वेक्षणातून अधोरेखित झालेली काळजीची बाब म्हणजे ७८ टक्के आमदारांच्या प्रतिसादानुसार त्यांच्या मतदारसंघातील उद्योग- व्यवसाय बंद पडले होते.

कोविडच्या पार्श्वभूमीवर संसदीय अधिवेशन व विधिमंडळ कामकाजातील कपातीविषयी ६५ टक्के आमदारांनी सहमती दर्शवली तर ३५ टक्के आमदारांनी लोकांचे विषय मांडण्यासाठी कामकाज व्हायला हवे, अशी भूमिका मांडली. मर्यादित कालावधीच्या अधिवेशनात तारांकित प्रश्न व लक्षवेधी सूचना ही आयुधे आवश्यक असावीत असे ७८ टक्के आमदारांना वाटते तर औचित्याचा मुद्दा हे आयुधही असावे असे ५६ टक्के आमदारांचे मत आहे.

विकासनिधीवर निर्बंध नको
कोविडमुळे निर्माण झालेल्या आर्थिक मंदीमुळे घेण्यात आलेला विकासकामावरील खर्चास कात्री लावण्याचा निर्णय ५२ टक्के सदस्यांनी मान्य केला तर ४८ टक्के आमदारांनी विकासनिधीवर निर्बंध नको, असे म्हटले. ८९ टक्के मतदारसंघात व्हेंटिलेटर सुविधा, अपुरे ऑक्सिजन बेड मनुष्यबळ,  रुग्णालयातील खाटांची कमतरता या आरोग्यसेवेत अडथळा ठरणाऱ्या बाबी होत्या. महाराष्ट्रासारख्या प्रगत आणि पुढारलेल्या राज्याकरिता ही परिस्थिती धोक्याची घंटा ठरते. ६३ टक्के आमदारांनी आपल्या मतदारसंघात कोविडचा प्रभाव अधिक असल्याचे तर २६ टक्के आमदारांनी मध्यम प्रभाव दिसला तर केवळ ९ मतदारसंघात उपलब्ध असलेल्या आरोग्यसेवा-सुविधा तेथील कोविडच्या परिस्थिती हाताळण्यासाठी पुरेशा होत्या, असे निरीक्षण आमदारांनी नोंदवले.

आरोग्याबाबत ३१ टक्के आमदारांचा प्रतिसाद
सर्व २८८ आमदारांपर्यंत पोचण्यासाठी ‘संपर्क’ने वेबआधारित सर्वेक्षण वापरले. एकूण ८९ आमदारांनी म्हणजेच एकूण २८८ विधानसभा सदस्यांपैकी ३१ टक्के सदस्यांनी प्रतिसाद दिला. हे आमदार २९ जिल्ह्यांतील असून ते अंदाजे २.६९ कोटी मतदारसंख्येचे प्रतिनिधित्व करतात. २४ पैकी १६ महिला आमदारांनी आणि २६४ पैकी ७३ पुरूष आमदारांनी प्रतिसाद दिला. प्रतिसाद देणाऱ्यांपैकी ४५ टक्के प्रथमच निवडून आलेले आमदार आहेत.

महत्त्वाच्या बातम्या

• वडिलांच्या आठवणीत गोपीनाथ गडावर प्रितम मुंडेंकडून फुलांची आरास
• दिवंगत विमलताईंचे स्वप्न सून नमिता मुंदडाकडून पूर्ण
• सामाजिक बांधिलकी! धनंजय मुंडेंकडून ‘त्या’ चिमुकलीचा पहिला वाढदिवस साजरा
• मंगलाष्टके नव्हे तर ‘वंदे मातरम्’च्या सुरात जुळल्या अनाथांच्या रेशीमगाठी
• ‘आ.संदिप क्षीरसागरांनी काकांच्या कामाचे श्रेय लाटले’