सावधान! रक्त तपासणीच्या नावाखाली कोरोना रुग्णांची लूट सुरू

बीड: कोरोना या महासंकटाने सर्वांनाच पछाडले आहे. कोरोनाच्या दुसऱ्या लाटेने तर पहिल्या लाटेपेक्षा जास्त थैमान घातले आहे. अशा वेळेस मदतीला धाऊन येते ती म्हणजे आरोग्य व्यवस्था. पण जर तीच धोका देत असेल तर? गोर गरीब रुग्णांची आर्थिक लूट करत असतील तर? असाच प्रकार घडलाय जिल्ह्यातील लोखंडी सावरगाव इथल्या कोविड रुग्णालयात. खासगी रक्त तपासणी लॅबचालकांनी दलालांच्या माध्यमातून गोरगरीब कोरोना रुग्णांची दिशाभूल करत आर्थिक लूट करत असल्याचा धक्कादायक प्रकार उघडकीस आला आहे.

लोखंडी सावरगावच्या कोविड रुग्णालयात गरीब रुग्णांची होणारी आर्थिक फसवणूक होणारा हा गैरप्रकार जिल्हा परिषद सदस्य अविनाश मोरे यांनी उघडकीस आणला आहे. या रॅकेटमध्ये रुग्णालयातील एक कर्मचारी सामील असल्याचे आढळून आल्यानंतर अधीक्षक डॉ. चंद्रकांत चव्हाण यांनी त्यास निलंबित केले असून एका खासगी लॅबच्या विरोधात पोलिसांत तक्रार दिली आहे.

अंबाजोगाई तालुक्यातील बर्दापूर येथील नागनाथ पांचाळ आणि त्यांचे कुटुंबीय कोरोना बाधित असल्याने त्यांच्यावर लोखंडीच्या कोविड रुग्णालयात उपचार सुरू होते. या वेळी तिथे नंदकिशोर पांचाळ या रुग्णालयातील कंत्राटी कर्मचाऱ्याने त्यांना रक्त तपासणी अत्यंत आवश्यक असून त्यासाठी दोन व्यक्तीसाठी साडेसहा हजार रुपये लागतील असे सांगितले.

आधीच कोरोनामुळे घाबरलेल्या नागनाथ पांचाळ यांनी तयारी दर्शविल्यानंतर नंदकिशोर पांचाळने खाजगी लॅबच्या माणसाला बोलावून घेत तपासणीसाठी रक्त दिले. याबाबत नागनाथ यांच्याकडून माहिती मिळाल्यानंतर बर्दापूर जि.प. सर्कलचे सदस्य अविनाश मोरे यांनी लॅब चालकास चांगलेच फैलावर घेतले आणि नंतर रुग्णालयाचे अधीक्षक डॉ. चंद्रकांत चव्हाण यांना याबाबत कळविले.

गोरगरीब रुग्णांच्या अज्ञानाचा गैरफायदा घेत त्यांना लुबाडणारे खासगी लॅबचालकांचे रॅकेट सर्व कोविड सेंटरमधून सक्रिय आहे. भोळेभाबडे गरीब रुग्ण हेरून खासगी रुग्णालयातून अव्वाच्या सव्वा दराने चाचण्या करण्यास भाग पाडतात. या रॅकेटची पाळेमुळे शोधून दलाल आणि सूत्रधारांवर कारवाई करावी, अशी मागणी जिल्हा परिषद सदस्य अविनाश मोरे यांनी केली आहे.

महत्वाच्या बातम्या

• रात्रीस खेळ चाले! परतूरमध्ये रात्रीच्या वेळी अवैध वाळू उपसा
• अखेर आन्वा प्रशासनाला आली जाग; पाच दिवसांचा जनता कर्फ्यू लागू
• शेतकऱ्यांना जुन्याच भावाने खत उपलब्ध केल्याबद्दल चंद्रकांत पाटलांनी मानले मोदींचे आभार 
• ‘महा विकास आघाडी कोकणातल्या शेतकरी बांधव व नागरिकांच्या सोबत खंबीरपणे उभी आहे’
• भाजपा मुंबई महानगरपालिकेविरोधात सदोष वृक्षवधाची याचिका दाखल करणार