🕒 1 min read
पुणे:- राज्यातील तीन पदवीधर आणि दोन शिक्षक मतदारसंघाच्या निकालातून राज्यातील सत्ताधारी महाविकास आघाडीला एकजुटीचे फळ मिळाल्याचे पाहायला मिळत आहे. शिवसेना, काँग्रेस आणि राष्ट्रवादी एकत्र निवडणूक लढल्याने भाजपला जबरदस्त धक्का बसला आहे. कारण, भाजपला औरंगाबादसह हक्काचा मानला जाणारा पुणे आणि नागपूर पदवीधर मतदारसंघही गमवावा लागला आहे. तर पुणे शिक्षक मतदारसंघातही काँग्रेसचा उमेदवार विजयी ठरलाय. पुणे शिक्षक मतदार संघातून काँग्रेसला उमेदवारी मिळावी म्हणून पहिल्यापासून कोल्हापूरचे पालकमंत्री सतेज पाटील आग्रही होते. तुम्ही फक्त उमेदवार द्या निवडून आणण्याची जबाबदारी माझी राहील असेही सतेज पाटील म्हणत होते. काल निकालानंतर सतेज पाटील यांनी आपले शब्द खरे करून दाखवले. शिक्षक मतदार संघातून काँग्रेसचे प्रा.जयंत आसगावकर निवडून आले आहेत.
पुणे शिक्षक मतदारसंघात महाविकास आघाडीचे जयंत आसगावकर यांनी विजय मिळवला. आसगावकर हे मूळचे कोल्हापूरचे असून पहिल्यापासून काँग्रेस पक्षाशी एकनिष्ठ आहेत. वेगवेगळ्या व्यासपीठांवर शिक्षकांची कामं ते करत असतात. पाच जिल्ह्यातील नेते आणि कार्यकर्ते या निवडणुकीत जिद्दीनं बाहेर पडल्याचे दिसून आले होते. जयंत पाटील, हसन मुश्रीफ, सतेज पाटील, विश्वजित कदम आदी नेत्यांनी पायाला भिंगरी बांधून प्रचार केला. महाविकास आघाडीच्या पश्चिम महाराष्ट्रातील नेत्यांसाठी ही प्रतिष्ठेची लढाई झाली होती.
दरम्यान, पुणे आणि नागपूर पदवीधर हे भाजपचे हक्काचे मतदारसंघ मानले जात होते. भाजपचे प्रदेशाध्यक्ष चंद्रकांत पाटील यांना पुण्याचं दोन वेळा प्रतिनिधीत्व केलं आहे. तर नागपूर मतदारसंघ हा भाजपचा बालेकिल्ला राहिला आहे. केंद्रीय मंत्री नितीन गडकरी यांनीही या मतदारसंघाचं नेतृत्व केलं होतं. तेव्हा पासून नागपूर पदवीधर हा भाजपकडेच होता. पण यंदा या दोन्ही मतदारसंघात भाजपला जबरदस्त हादरा बसल्याचं पाहायला मिळतं आहे.
महत्वाच्या बातम्या
- नागपूर व पुण्यातील भाजपचा पराभव ही बदललेल्या वादळी वाऱ्याची चाहूल; शिवसेनेची भाजपवर टीका
- ‘हा विजय महाविकास आघाडीतील सर्वांच्या संघटीत व सुनियोजित प्रयत्नांचा परिणाम आहे’
- विधान परिषद निवडणुकीचे निकाल राज्य सरकारला अधिक भक्कम करणारे : अशोक चव्हाण
- मुख्यमंत्री आज समृद्धी महामार्गाची पाहणी करण्यासाठी अमरावती, औरंगाबाद जिल्ह्यात
- ‘आम्ही सर्वशक्तिमान एकटेच लढणार व जिंकणार हि खुमखुमी त्यांचीच होती, ती चांगलीच जिरली’
