नवी दिल्ली : संपूर्ण कोरोनाला हरवण्यासाठी सध्या देशात लॉकडाऊन सुरु आहे. तसेच भारतामध्येही राज्य पातळीवर तसेच राष्ट्रीय पातळीवर सहाय्यता निधी गोळा करण्यासाठी सामान्यांनी पुढे यावे असं आवाहन सरकारी यंत्रणांनी केलं आहे.
याच पार्श्वभूमीवर तेलंगणामधील एका सफाई कर्मचाऱ्याने करोनाविरुद्धच्या लढ्यासाठी पैसे देण्यासंदर्भातील आवाहनाला प्रतिसाद देत या सफाई कामगाराने आपला दोन महिन्याचा पगार म्हणजेच १७ हजार रुपये सहाय्यता निधीला दिले आहेत.
‘माझ्या राज्यातील सामान्य नागरीक हेच खरे हिरो आहेत. आज बोंथा साई कुमार या उत्तनूरमधील सफाई कामगाराने त्याच्या दोन महिन्याचा पगार १७ हजार रुपये मुख्यमंत्री सहाय्यता निधीसाठी दिले,’ असं तेलंगणाचे माहिती आणि तंत्रज्ञान मंत्री के.टी रामा राव यांनी ट्विटवरुन या कर्मचाऱ्याचे कौतुक केलं आहे.
दरम्यान, देशामधील अनेक ठिकाणी स्थलांतरीत कामगार तसेच गरीब जनतेला लॉकडाउनचा मोठा फटका बसला आहे. हातावर पोट असणाऱ्यांना सेवाभावी संस्था तसेच राज्य सरकारांच्या माध्यमातून मदत केली जात आहे.
